Eze 22 | NdeIBE | STEP | Ilizwi likaJehova lafika kimi lisithi:

Ezekiel 22

Izono ZeJerusalema

1 Ilizwi likaJehova lafika kimi lisithi:

2 “Ndodana yomuntu, uzalahlulela na? Uzalahlulela na lelidolobho lokuchithwa kwegazi? Ngakho melana lalo kanye lezono zalo ezenyanyekayo 3 uthi: Nanku okutshiwo nguJehova Wobukhosi: Wena dolobho elizilethela ukutshabalala ngokuchitha igazi phakathi kwalo njalo lizingcolisa ngokwenza izithombe, 4 usube lecala ngenxa yegazi olichithileyo njalo usungcoliswe yizithombe ozenzileyo. Usulethe izinsuku zakho ekupheleni, lesiphetho seminyaka yakho sesifikile. Ngakho ngizakwenza ube yinto yokuklolodelwa ezizweni lenhlekisa emazweni wonke. 5 Labo abaseduze kanye lalabo abakhatshana bazakuhoza, wena dolobho elidumazekileyo, eligcwele ukuxokozela.

6 “ ‘Khangela ubone ukuthi yileyo laleyo inkosana yako-Israyeli ephakathi kwakho isebenzisa amandla ayo ekuchitheni igazi.

7 Phakathi kwakho iphathe uyise lonina ngokweyisa; phakathi kwakho icindezele abezizweni iphathe kubi izintandane labafelokazi. 8 Uzeyisile izinto zami ezingcwele watshaphaza lamaSabatha ami. 9 Phakathi kwakho kulabantu abahlebayo abahlose ukuchitha igazi; phakathi kwakho kulalabo abadlela ezindaweni zokukhonzela entabeni benze lezenzo zesigweba. 10 Phakathi kwakho kulalabo abangcolisa imibheda yaboyise; phakathi kwakho kulalabo abadlwengula abesifazana besesikhathini sabo, lapho bengahlanzekanga ngokomkhuba. 11 Phakathi kwakho indoda yenza ukona okwenyanyekayo lomfazi kamakhelwana wayo, enye ingcolise umalokazana wayo ngendlela ehlazisayo; enye njalo idlwengula udadewabo, indodakazi kayise uqobo.

12 Phakathi kwakho abantu bayavuma ukuthengwa ukuba bachithe igazi; uthatha inzuzo lomvuzo odlulisileyo emalini ebolekisiweyo, uthole inzuzo engafanelanga kumakhelwana wakho umbamba ngamandla. Njalo usungikhohliwe, kutsho uJehova Wobukhosi.

13 “ ‘Ngeqiniso ngizatshaya izandla zami ngibabaza inzuzo engafanelanga osuyenzile kanye legazi osulichithe phakathi kwakho.

14 Isibindi sakho sizaqinisela yini loba izandla zakho ziqine ngosuku ngiqondana lawe na? Mina Jehova sengikhulumile, njalo ngizakwenza lokho. 15 Ngizakuhlakazela phakathi kwezizwe ngikuchithachithele emazweni; lokungcola kwakho ngizakuqeda. 16 Lapho usungcolisiwe phambi kwezizwe, uzakwazi ukuthi mina nginguJehova.’ ”

17 Ilizwi likaJehova laselifika kimi lisithi:

18 “Ndodana yomuntu, indlu ka-Israyeli isibe ngamanyala kimi. Bonke balithusi, lomnusu, lensimbi kanye lomthofu okusele phakathi kwemvutho. Kungamanyele esiliva. 19 Ngakho nanku okutshiwo nguJehova Wobukhosi: ‘Ngokuba lonke selibe ngamanyele, ngizaliqoqela eJerusalema. 20 Njengabantu beqoqela isiliva, lethusi, lensimbi, lomthofu kanye lomnusu emvuthweni ukuba kuncibilikiswe ngomfutho womlilo, ngizaliqoqa kanjalo ngokuthukuthela kwami langolaka lwami ngilibeke phakathi kwedolobho ngilincibilikise. 21 Ngizaliqoqa njalo ngizalivuthela ngolaka lwami oluvuthayo, njalo lizancibilikiswa phakathi kwalo. 22 Njengesiliva sincibilikiselwa phakathi kwemvutho, kanjalo lani lizancibilikiselwa phakathi kwalo, njalo lizakwazi ukuthi mina uJehova sengithululele ulaka lwami phezu kwenu.’ ”

23 Ilizwi likaJehova lafika futhi kimi lisithi:

24 “Ndodana yomuntu, tshono elizweni uthi, ‘Uyilizwe elingazange libe lezulu kumbe imikhizo ngosuku lwentukuthelo.’ 25 Kulokucetshwa kwamacebo amabi ngamakhosana alo phakathi kwalo njengesilwane esibhongayo sidlithiza esikubuleleyo; adla abantu, athathe inotho kanye lezinto eziligugu andise labafelokazi phakathi kwalo. 26 Abaphristi balo bephula umthetho wami njalo bahlambaza lezinto zami ezingcwele; kabehlukanisi phakathi kokungcwele okujayelekileyo; bafundisa besithi akulamehluko phakathi kokungcolileyo lokungangcolanga; njalo bavala amehlo abo ekugcineni amaSabatha ami, okwenza ngithukwe phakathi kwabo. 27 Izikhulu zalo phakathi kwalo zinjengezimpisi zidlithiza ezikubuleleyo; zichitha igazi zibulale labantu ukuba zithole inzuzo engafanelanga.

28 Abaphrofethi balo baziba izenzo lezi besenzela bona ngemibono yamanga lokuhlahlula okungamanga. Bathi, ‘Nanku okutshiwo nguJehova Wobukhosi’ – kodwa uJehova engakhulumanga. 29 Abantu belizwe benza imisebenzi yokufuna imivuzo ngamandla kanye lobuphangi; bacindezela abayanga labaswelayo, baphathe kubi labezizweni, babenqabele ukulunga.

30 “Ngadinga umuntu phakathi kwabo owayengakha umduli ame phambi kwami esikhaleni emele ilizwe ukuze ngingalitshabalalisi, kodwa ngamswela.

31 Ngakho ngizathululela ukuthukuthela kwami phezu kwabo ngibaqede ngolaka lwami oluvuthayo, ngikwehlisele phezu kwamakhanda abo bonke abakwenzayo, kutsho uJehova Wobukhosi.”